ସାହସ କୁଳଉ ନ ଥିଲେ

ମଉନ ରୁହ

କିଛି କୁହନାହିଁ,

ନୀରବତାରୁ ପଢ଼ିପାରିବି

ତୁମ ପ୍ରଗଳ୍‌ଭତାର ମୁଦ୍ରା।

କିଏ କହୁଛି

ସମାନ୍ତରାଳ ଦୁଇ ରାସ୍ତାର ସଂପର୍କକୁ

ନେଇ ନ ଥାଏ କୌଣସି ପରିଭାଷା

ନ ପାଇବାର ଅନିବାର୍ଯ୍ୟତା ସତ୍ତ୍ବେ

ପରସ୍ପରକୁ ଚାହିଁ ଚାହିଁ

ଜୀବନ ବିତେଇଦେବାର ଭାଗ୍ୟ

ସମସ୍ତଙ୍କୁ ତ ମିଳେ ନାହିଁ।

ଆମେ ଅଲଗା ଅଲଗା ଦ୍ବୀପର ରାଜା

ଆମ ପଛପଟେ

ରାଜ୍ୟହୀନ ରାଜାର କାହାଣୀ,

ସାମ୍ରାଜ୍ୟର ସୀମାରେଖା ଆମର

ହୃଦୟରୁ ହୃଦୟ ଯାଏ

ମନରୁ ମନ ଯାଏ

ଯାହାକୁ ଲେଖି ରଖିବ ନାହିଁ

ଆଉ କେଉଁ ଦେଶର ଇତିହାସ।